Portfolio Europeich

ARCHEOLOGIA

"Europa"
Proiet per n Portfolio europeich dla rujenedes

L Portfolio europeich di lingac (PEL) documentea te na maniera strutureda la ativiteies y la cumpetënzes de n sculé tl ciamp dla rujenedes che ël cunësc. L ie n strumënt che ti vën dat tla mans al sculé y l à na funzion sibe pedagogich/educativa che de valutazion.
Mé sce l se tën al “Cheder de referimënt europeich” vëniel acredità dal Cunsëi Europeich y l giapa si logo.
L PEL ie n documënt che ti permët a chiche ie tl lëur de mparé o à bele mparà una o deplu rujenedes, sibe a scola che ora de scola, de pensé sëura sun si livel de cumpetënza linguistica y sun si esperienzes cultureles, per se giaurì al plurilinguism y al pluriculturalism.

La 2 funzions prinzipeles dl PEL:

• pedagogica: l documentea chël che l sculé à fat tl ciamp dla rujenedes a na maniera che l possa se rënder cont dla cumpetënzes che l à arjont y di traverc che l à mo dant a sé. L ti juda a se sëurantò si respunsablteies

• de documentazion y valutazion: l PEL ie n mesun nuef de valutazion che possa unì adurvà deberieda cun chël tradizionel o te vel’situazion nce mpede chël; l ti dà al sculé la puscibltà de documenté si cumpetënzes linguistiches aldò de n model recunesciù te duta l’Europa.

L Portfolio europeich di lingac ie spartì su te trëi pertes:

• L passaport linguistich
Chësc dà na vijion dl livel de cumpetënza linguistica (ntënder, liejer, comuniché, rujené, scrì) che l studënt à arjont te doves o deplu rujenedes aldò de na valutazion che ël se dà, cun l aiut di nsenianc y aldò di criteres dac dant.

• La biografia dl mparé la rujenedes
Pra chësta pert toca la storia persunela dl mparé la rujenedes, l’esperienzes de mpurtanza tl ciamp linguistich y culturel y i cuestioneres per l’autovalutazion.

• L Dossier
Tlo vëniel tenì su lëures persunei che documentea te na maniera ejemplera cie che l ie unì fat tla singula rujenedes.

L Portfolio europeich di lingac per Südtirol

Per Südtirol iel unì pensà de fé un n Portfolio per duta la trëi grupes linguistiches, che tënie cont dla 4 rujenedes plu adurvedes tla Provinzia (tudësch, talian, ladin, nglëisc).
N à tenì cont di livei de scola y dl’età di sculeies y á laurà ora:
1. n Portfolio per i sculeies dla IV y V tlas dla scoles elementeres cun na funzion plu pedagogica
2. n Portfolio per i sculeies dla scola mesana ënghe cun funzion dantaldut pedagogica
3. n Portfolio per i studënc dla scoles autes cun na funzion sibe aministratif/valutativa che pedagogica; l ti permeterà de mustré su si cumpetënzes linguistiches sibe tl mond dl lëur che sce l va inant cun i studi.
Acioche i nsenianc posse lauré cun l Portfolio ti uniral pità ucajions de ajurnamënt y de sustëni tres materiai aldò.

Pra chësc proiet al cunlaurà la trëi Ntendënzes y i trëi Istituc pedagogics, che à numinà si raperesentanc tla 3 grupes de lëur:

* Grupa de proiet
* Grupa de cuordinamënt
* Grupa de lëur

Do 2 ani de lëur ie l Portfolio di lingac per la scola elementera unì prejentà al Cunsëi d’Europa a Straßburg per la validazion, che ti ie unida cunzeduda ai 04/11/2004. La sperimentazion dl Portfolio ie unida fata ntan l ann de scola 2003/04 te scoles desvalives dla trëi grupes linguistiches.

L Portfolio di lingac per la scola mesana ie unì validá dal Cunsëi d’Europa a Straßburg ai 26/05/2005. Do la sperimentazion te de plu scoles ntan dut l ann passà possa i nsenianc nteressei a lauré limpea te si tlas se l damandé per l ann 2006/07.

 

Informaziuns