LAURUN DEBORIADA 4 y 5

LAURUN DEBORIADA

"Unitês didatiches por l’insegnamënt dl ladin tla 4ª y 5ª tlassa elementara "
LAURUN DEBORIADA 4 Y 5

 

La presentaziun dles unitês didatiches ales insegnantes/ai insegnanć interessà é:

te Gherdëna: tla scora elementara da Urtijëi, ai 13.09.2011 dales 14.30
tla Val Badia: tl salf di stödafüs a San Martin de Tor, ai 16.09.2011 dales 15.00

„Laurun deboriada 4 y 5“ é le meso didatich nü por inisigné ladin tla 4ª y 5ª tlassa dla scora elementara. Al se trata de na revijiun completa di „Sföisc de ladin“ por la 4ª y 5ª tlassa dla scora elementara.
N grup de maestri aposta s’un à tut sura de chësc gran laûr, coordinè da Richard Mair y Claudia Rubatscher. Por la verjiun badiota à colaborè Cristina Clara, Patrizia Pedevilla, Edith Trebo, Evelyn Pitscheider, Kerstin Ties, Giuliana Dejaco, Sara Frenes, Ulrike Pedevilla, Judith Winkler y Martin Kostner. Le grup de laûr de Gherdëna ê metü adöm da Andrea Perathoner, Theresia Ploner, Sara Spisser, Marina Holzknecht, Florian Lardschneider y Silvia Pitscheider.
Partezipé ala realisaziun de chësc meso didatich à inće scolars dles döes valades y la maestra Barbara Mühlmann cun sü dessëgns plajors, che porta pro a descedè  la ligrëza da imparè y dëida a chësta moda le prozès de aprendimënt.
I modì por chëstes unitês nöies é stà i mesi de laûr por l’insegnamënt dl ladin tla terza tlassa elementara „Laurun deboriada 3“ y „Vare por Vare“ tla scora mesana. Al é insciö gnü laurè fora 12 unitês didatiches por la Val Badia y 15 por Gherdëna, sön tematiches desvalies, che à da nen fà cun le monn, le vire, les esperiënzes di mituns, tignin sambëgn inće cunt dles indicaziuns provinziales por la scora elementara, che mët dant obietifs y competënzes che le scolar dess arjunje.
Le numer dles unitês y la varieté dles tematiches darà a vigni insegnant la poscibilité da se chirì fora ia por l’ann i argomënć plü adatà al momënt y ala tlassa. Por podëi jì plü a funz ćiafarà i maestri, dlungia le material stampè, inće n CD/DVD cun filmać, registraziuns audio y ćianties che passenëia pro l’argomënt.
Le scolar dess podëi laurè autonomamënter, da su o adöm cun compagns, por podëi man man aprofondì na tematica. Por arjunje chësc obietif ti vëgnel dè la poscibilité ai scolars da laurè te na maniera dër desvalia: scrì, lì, depënje, ponsè, baié, ćiantè, pastelné, chirì y ciafè, ascuté sö.

Informaziuns pro:claudia.rubatscher@provinz.bz.it

 

 

Cuntać