grafia-nöia

»por les scolines y scores ladines«
GRAFIA NÖIA - LADIN DLA VAL BADIA

Anteprima - Grafia nöia - Ladin dla Val Badia - PDF

Le codejel vá sëgn en stampa y gnará spo mené fora ales scolines y scores

Le sföi »Grafia nöia - Ladin dla Val Badia« é n ressumé dles regoles dla grafia dl ladin scrit dla Val Badia cun lapró les ultimes mudaziuns. Al dess ester n aiüt pratich por düc chi che scrí tesć por ladin, anfat sce por fins privac o te na forma ofiziala.

Ince sce la grafia dl ladin dla Val Badia nes aparësc incö sciöche valch daldöt de »normal«, ne podunse nia se desmentié che al á orü ester tröc dejenars y nia püc sforc por la lauré fora, la renforzé y la consolidé te sü aspec desvalis. La grafia d’aldedaincö é porchël le resultat de n tru de svilup lunch, olache an á porvé da ciafé i mius compromisc danter mantignimënt dles carateristiches dl lingaz y pratizité tl’adoranza.

Sce la grafia ê tl pröm, porvia dla mancianza de n dër sistem, ciamó scialdi lëdia y arbitrara – vignun scriô n püch sciöche al ti gnô imënt – é incö la chestiun bëgn cotan plü inant y ponüda sön na fondamënta linguistica valgamia frëma. Mo chi che se dá jö plü a funz cun la grafia dl ladin odará defata che la storia de süa normaziun y scemplificaziun n’é dessigü ne nia ciamó stlüta jö daldöt.

La produtivité de tesć scric por ladin é incö tan grana co che ara n’é ciamó mai stada. Le status dl ladin scrit ciafa insciö tres n majer pëis y cun ël aumënta ince le prestisc cultural dla mendranza – internamënter y ince foradecá. Le scrí ladin se damana incö porchël regoles scëmples y tleres y che sides pratiches y economiches tl’aplicaziun. Chësc é ince sté le pinsier de basa che á acompagné y rovenü dal scomenciamënt incá le laur dla comisciun te so impëgn da porté inant la reforma ortografica da püch aprovada y jüda en forza.
Le scrí dërt á te nosta sozieté d’aldedaincö na gran importanza y i fai vëgn interpretá sciöche na deblëza de chël che scrí. La scomenciadia de chësta ultima reforma ortografica é porchël gnüda orüda y inviada ia tl concret dala Scora cun le fin da eduché ince tl ladin a na buna comunicaziun scrita. Cun chësta revijiun dess le sistem grafich dl ladin scrit dla Val Badia gní consolidé y le lingaz instës gní etablé tres deplü sciöche stromënt da adoré te na verjiun le plü unitara che ara vá por la valada intiera.

Les regoles plü scëmples y tleres dess implü ince alisiré le laur dl personal insegnant dles scolines y scores y motivé tl medem tëmp i jogn y i manco jogn da scrí plü ion y porchël ince plü sovënz por ladin.

Les regoles d’ortografia nöies é gnüdes laurades fora en colaboraziun cun de plü rapresentanc dla scora ladina, l’intendënt Roland Verra, les ispeturies Rosmarie Crazzolara, Edith Ploner, la direturia Claudia Canins, le diretur Otto Moling, le diretur Felix Ploner, les insegnantes Magdalena Miribung, Cristina Castlunger y Maria Frenner, le presidënt y le diretur dl Istitut Ladin »Micurá de Rü« Albert Videsott y Leander Moroder, i colauradus dl Istitut Sara Moling y Werner Pescosta, le professur de ladin dl’Université de Balsan Paul Videsott y l’assessur Florian Mussner y é jüda en forza ai 23.03.2015.

Felix Ploner
Diretur dl Ciamp Inovaziun y Consulënza