SURI

4 stories te 4 lingac
SURI

Download di chedri:

Simeli

Barbolo

Jënt

Deserc

 

 

comunicat stampa

Suri – cater stories te cater lingac por i plü pici
ince da lí dant.
 
 
N möt che vá fora le monn cun so pere y n müsc a chirí le consëns dla jënt, che al ne ciafa sambëgn nia, n ël gran y gros che vëgn striné tl cör frëit y grisc de n zbergl, dui fredesc che röia pro n ander plëgn de monëdes d’or y peres prezioses: chisc é i protagonisć dles cater stories contignüdes tl liber »SURI« che le ciamp Inovaziun y Consulënza dl Departimënt Educaziun y Cultura ladina presentëia ai 15 de dezëmber. La publicaziun é destinada ales scolines y ales scores mo ince a n publich plü ampl de mituns che mët man da lí instësc stories y de adulc che ó ti lí dant na storia ai pici.
 
Les scolines y scores ciafa na confeziun cun döt le matererial didatich. Le liber enstess cun les 4 stories pó gni damané dô da düc pal ciamp Inovaziun y Consulenza – pedagogich.it.
 
Ara se trata de n liber ilustré che contëgn cater stories scrites por ladin, talian, todësch y inglesc. Por sostignì l’aprendimënt di lingac él gnü svilupé pro vigni titul materiai surapró che an ciafa te na confeziun didatica completa, che contëgn consëis metodologich-didatics y dá la poscibilité da surantó propostes de laur cun material adaté insciö da podëi jí plü sot tl contignü, tla comprenjiun y tla elaboraziun dles stories.
 
Le material didatich nasc sciöche proiet de cater studëntes ladines dla Univerité Lëdia de Balsan tla Facolté de Sciënzes dla Formaziun a Porsenú. Tratan les leziuns de „Didatica dl lingaz dla uma“ cun le profesur Rico Cathomas, á Katrin Crazzolara, Carmen Insam, Barbara Kasslatter y Michela Prinoth lauré fora n pice sföi por la scolina pian ia dal liber „Stories“ che l’Istitut Pedagogich Ladin â dé fora dl 2007. Ares á chirí fora cater stories, les á scemplificades y laurades fora didaticamënter por mituns y mitans tl’eté dla scolina. Le proiet é spo gnü tut sö da Inovaziun y Consulënza y lauré fora ciamó n iade ince sot l’aspet dla didatica integrada cun l’aiüt dla maestra dla scolina Michela Prinoth. »L’archirida de material didatich adaté é na sfida costanta por düc y dötes che co laora tl monn dla scolina y scora. Sce al é spo le personal pedagogich enstëss co se dá jö con la produziun de material, spo porta chësc sogü ciamó plü cualité«, dij l’ispeturia dles scolines ladines Edith Ploner.
 
Cun Suri se daür na finestra sön le monn. Suri é la figöra che acompagnëia sciöche n „fi cöce“ fora por les cater stories. Ara é le simbol de na comunicaziun interlinguistica y interculturala, deache les stories che é gnüdes chirides fora trasmët valurs che é l’espresciun de esperiënzes de porsones che alda pro cultures desvalies y pó lié adöm sciöche n punt porsones y cultures.
Le proiet »Suri« é gnü coordiné con gran pasciun y lizitënza dla maestra Claudia Rubatscher, comanada pa Inovaziun y Consulënza, y co insëgna sëgn a Freiburg tla Germania, olache ara á soratut na esperiënza de vita nea. Sce al é garaté n proiet co porta ligrëza belo da ti ciaré, spo é chësc le merit de Anita Demetz, che á sorantut y porté tres la ligna grafica, sides dal liber y dal cufer.
 »Les cater stories fej insciö pert dla seria de material didatich lauré fora aposta por la realté ladina che promöi i trëi lingac provinziai adöm al inglesc dala scolina insö, te na vijiun integrada y creativa y en continuité cun la scora elementara«, dij le diretur Inovaziun y Consulenza Felix Ploner. Inovaziun y Consulënza á te so fin istituzional dlungia la promoziun dl lingaz ladin, dl plurilinguism y dla formaziun di insegnanc, la profescionalisaziun y inovaziun dl monn scolastich, dantadöt le compit dl svilup y la produziun de materiai didatics. Ara se trata tlo de libri, material didatich, material audiovisif, che n’é nia da ciafé sön le marcé general y chi mesi didatics, che pó aumenté la cualité dl insegnamënt y aprendimënt. Chëste publicaziuns vëgn svilupá y publicá y metüdes a desposiziun dles scolines y scores ladines y ince al monn dla scora en general.

 

Cuntać