Analisa linguistica

Ntan l prim „feedback“ tla scola elementera de Urtijëi: ai 10 de juni 2009

 

N RESSUMÉ DI RESULTAC CUMPLESSIFS DL’ANALISA LINGUISTICA DI SCULEIES Y DLA SCULÉES DLA CUINTA TLASSES DLA SCOLES ELEMENTERES DE GHERDËINA Y DLA VAL BADIA Y DE CATER TLASSES DLA SCOLES ELEMENTERES TUDËSCES DE FELDTHURNS, DE VILANDERS Y DE PERBIAN Y DLA SCOLES TALIANES “DANTE ALIGHIERI” Y “DON MILANI” AN PREJENTÀ ALAUTORITEIES, ALA DIRETëURES Y AI NSENIANC Y ALA NSENIANTES DLA SCOLES RAIONELES DLA VAL BADIA AI 5 DE JUNI DALA 3 DOMESDÌ TL GRAN SELF DL ISTITUT LADIN A SAN MARTIN. PER LA SCOLES RAIONELES DE GHERDËINA AN METÙ A JÌ L MEDEMO “FEEDBACK” AI 10 DE JUNI 2009 DALA 3 DOMESDÌ TL’AULA MAGNA DLA SCOLA ELEMENTERA DE URTIJËI.


L Cumité cun si Servisc se ova bele ancuntà d’autonn dl 2008 cun la pruf.a Rita Franceschini y cun la dut.a Gessica De Angelis dl Zënter linguistich de Bulsan che ie lià al’Università de Bulsan-Persenon per nvië via n’evaluazion de gran nteres. N se ova tëut dant de analisé l livel scrit dla rujenedes: LADIN, TUDËSCH Y TALIAN di sculeies y dla sculées dla 5a tlasses de uni scola elementera de Gherdëina y dla Val Badia y de fé n pitl cunfront cun na pitla grupa de sculeies y de sculées de rujeneda dl’oma tudëscia y taliana, per vester boni de mustré su l livel dla produzion scrita y nia mé dla cumprenscion di trëi lingac.

Bele de nuvëmber oven cris ora 3 ilustrazions cun 6 chedri l’una che jiva drët bën per scrì na storia te 30 menuc zënza l aiut de vel’nseniant/a y zënza pudëi se nuzé dl vocabuler. Cun l sustëni di soministradëures y dla soministradësses foven stac boni de mëter a jì la proes de ladin, de tudësch y de talian mo dan Nadel per finé via de jené 2009. Riesc do oven na bela cumpëida de scric tla mans: 316 per talian y de chisc 54 di sculeies y dla sculées dla scoles talianes, 317 per tudësch y de chisc 59 di sculeies y dla sculées dla scoles tudësces, 107 per ladin badiot y 157 per ladin gherdëina, de ndut 897.

N ova sambënzënza tenì ite l dërt dla privacy. Nsci ne fovel degun inuem de vel’ sculé o de vel’sculea y nianca de vel’nseniant o de vel’nsenianta sun la stories ilustredes, ma mé n numer prugressif.

Per se fé plu saurì cun l’analisa fovel debujën de scrì ju duc i tesć cun l computer y l Servisc per l’evaluazion à cialà de ti vester a chësc gran lëur. I scric ie pona ruvei tla mans dla grupes de lëur che la dut.a Gessica De Angelis ova cherdà ite per n domesdì de furmazion a Bulsan. N à pudù ti dé diretives prufesciuneles y stlarì plu avisa i fins scientifics cun i aspec dl lingaz da cunscidré y la pruzedura de lëur cun si metodologies. Uni culaburadëur/culaburadëssa dla grupes de lëur y dl Servisc per l’evaluazion à analisà na bela cumpëida de scric aldò dla frases prinzipeles y dependëntes, dla paroles per test, dla maniera de adurvé i verbs y de si tëmps, dl numer cumplessif di verbs y dla varieteies dl lessich adurvà pra i verbs. Per fé dut a puntin adurvoven na gran cunzentrazion, truepa pazienza y dantaldut artenienza. Ma n ie mpo stac boni de finé via dut y de chësc muessen ti sentì gra ala coordinadëura dl Servisc, ala culaburadëssa y ala culaburadëssa amministrativa y ala grupes de lëur che à desmustrà n gran mpëni.

La dut.a Gessica De Angelis y la dut.a Gerda Videsott à dopro cialà tres dut a puntin y l pruf. Biague à laurà ora i dac y la statistica. Nsci iesen ruvei pra i prims resultac che ie cumplessivamënter de marueia y zënzauter da mustré su, ma purempò scialdi defrënc y, danter una na rujeneda y l’autra, nia for valivei ora danter la scoles elementeres de Gherdëina y dla Val Badia.

Chësta analisa linguistica à zënzauter purtà pro a na reflescion plu sota sun la cualità dla scoles elementeres ladines y sun si daunì. Garantì la cualità tl nseniamënt di lingac ie uni di fins primeres dla SCOLA LADINA (BZ) che cun si plurilinguism a for auzà ora la mpurtanza de duta la rujenedes nseniedes sibe a usc che tl scrit. L suzes scolastich possen mé arjonjer, sce tl’ufierta furmativa dla scoles elementeres ne se desmëncen nia dl gran valor dla rujenedes.

Contatti